حاله من حالاتى !

السلام عليكم ورحمة الله وبركاته

بصراحه ما كنتش مرتبه أكتب بوست النهارده

ومعلشى ممكن تلاقوا الدنيا متلخبطه شويه

لأنى بصراحه قرفانه جدا جدا

إلى بيحصل حوالينا فعلا يسد النفس ومش مخلينى نفسى أعمل حاجه ولا أقول حاجه


طبعا الكارثه إلى بتحصل لأهل غزه والجدار ومنع أبسط المساعدات عن ضعفاء ربنا إبتلاهم

بعدو ومحتل لا بيرحم ولا بيتراجع


وجت حتى بلادنا إلى المفروض تحاول تخفف عنها بأى طريقه خنقتها أكتر وأكتر بقت

إسرائيل تشد الحبل من ناحيه ومصر بجدارها من ناحيه



مش عارفه دى خطه ولا ضغط ولا إيه بالضبط

ومصر إلى بقت صورتها وحشها جدا بسبب حاكم ولا حكومه لا تتقى الله

ومصر لا هى مبارك ولا حكومته

مصر هى الغلابه والمطحونين الطيبين

عذرا يا أهل العزه ولا تؤاخذونا بذنوب ولاة أمورنا

عذرا أقصانا فما ضيعناك إلا ضعفا من حكامنا

ولكن حتما ستضيء شمعة الحريه ولن يشعلها إلا الشرفاء المخلصين المسؤمنين حقا


وحالنا

بقى حالنا كل يوم من أسوء لأسوء


أنا كرهت التليفزيون والجرايد والنت


تليفزيون : برامج وأخبار تسود الدنيا فى عنينا أكتر ما هى كوارث وحوادث وجرايم


أفلام تقرف وتفاهه


بس أكيد البرامج الدينيه والقنوات الدينيه بصراحه الحاجه الوحيده إلى بتهون شويه وياريتهم

سايبنها فى حالها


جرايد : نفس الحال أخبار تنكد وأخبار للأفلام الى تقرف وبورصه وإقتصاد مخروب


النت : برضه نفس إلى بيتشاف لا جديد بل أسوء بقليل

والناس خلصت الرحمه من قلوبها ودخل مكانها حقد وغل ودنيا


لما حسيت إن الدنيا خلاص ما بقتش غير كده


هى الدنيا بس كده



حروب وحصار ودمار وجرائم وكوارث وناس بتموت فى ناس وناس بتاكل فى حقوق الناس


و إلى طايل ياخد حاجه بياخدها


فين الطيبه والحب والوفاء والإخلاص معانى بدأت تنتهى من حياتنا هى أكيد قيم راسخه بس


بإدينا خناقناها


وللأسف زى ما بنخنق جوانا معانى جميله خلاص إتعودنا على الخنق والقتل ومناظر الدم

البشعه



حتى الضعيف إلى بيستجير بينا خنقناه بتحكمنا فيه وبنينا بينا وبينه طوب وخرسانه ما


تدوبهاش المعانى إلى كانت جميله


دى بقت قسوة قلوب ولا موت ضمير


لازم نفوق

وعمرنا ما حنسمح لدنيتنا تكون كده

دى محطه بس فى حياتنا ولازم نمشى على قضبانها لا نموت زى إلى بيموتوا فى حوادثها

لازم نفوق

لأننا أول الخسرانين فى معركة الضمير والا ضمير

معلشى لو كنت نكدت عليكوا بس عارفه إنكوا كده كده متنكدين


ربنا يرفع عنا ويريح قلوبنا ويراضينا ويرضى عنا ويرفع عن المسلمين وينصر الإسلام

ويعز المسلمين

اللهم أمين