الأحد، 27 فبراير، 2011

إلى إيده تعلى على سيده ... تتقطع له إيده

لحد النهارده ما كنتش بتكلم ولا بكتب فى سلبيات كتير من إلى حاصله

لآنى شايفه خلاص مش وقت العتاب والحساب

نخلى الحساب والعقاب للمسئولين عنه

لأننا فى وقت لازم نشتغل فيه أكتر ما نتكلم ونقلب فى الدفاتر

وإستوقفنى حاجه مهمه قوى

إستفزنى كلام مدير أمن البحيره لرجالته إلى كل الدنيا شافته

إحنا إسيادهم

وإلى إيده تتمد على سيده نضربه بالجزمه وتتقطع له إيده

همه إلى كانوا بيصروخوا وبيبوسوا إدينا نرجع

ليه

هو لسه ما فهمش الدرس ؟

هو مين قاله إننا طلبنا حتى منهم مساعده بيتهيألى إلى حصل فى مصر فترة الثوره مش محتاج يتقال


همه ليه مصرين يوسعوا الفجوه بينا وبينهم

بصرف النظر إنهم أقالوه ده كان بيفهم الكلام ده لرجالته إلى همه موجودين لسه


وكملوا جملته ...... نقطع له إيده

هما ليه مصرين نرجع للصفر تانى

فينهم دول والبلطجيه ماشين فى الشوارع بينهبوا ويخربوا


فينهم دول وتجار المخدرات إلى كانوا بيداروا وهمه بيبيعوها دلوقتى فى وسط الشواره بيجهروا بيها


فينهم وفينهم .....

كلام وزير الداخليه الشرطه مش حتستعيد كامل طاقتها غير بعد 4 سنين

إحنا حنفضل فى المهزله والتسيب ده 4 سنين

ما بنكرش إن فى منهم ناس كويسه

بس ياترى كام ؟

وياترى لسه موجودين ؟

الأربعاء، 16 فبراير، 2011

حمد الله على سلامتك يامصر


طوينا الصفحه ورمينا الكشكول وكسرنا القلم القديم


وحشترى أحلى كشكول لحبيبتى

أكتب فيه أحلى كلام وحلونها بأحلى الألوان


مصـــــــــــــــــــــــــــر أم الدنيا

مافيش كلام يتقال بعد إلى إتكتب بدم شهداء وشباب مصر

غير مبرووووك علينا مصر من تانى

مبروك علينا بلدنا غيرناها بإدينا

ولسه حنبنيها ونعمرها من تانى برضه بإدينا