الأحد، 25 أكتوبر، 2009

أعترف أنى لم أتأثر إلا اليوم

جيت النهارده أعترف بحاجه مهمه جدا جدا
أسأل المولى عز وجل أن يغفرها لى


أول موقف

منذ فتره وشاركت فى حملة مدونتك حتنقذ طفلك لصالحك مستشفى 57357
وفعلت الموضوع ونقلته

ولكنى اعترف أنى لم أحسه بمشاعرى ونقلته تعاطفا ليس إل
ا

ثانى موقف

دعتنى صديقه للجروب الى قلت لكوا عليه إلى بيعملوا خير فى المنصوره
وبيروحوا مستشفى الأورام علشان الأطفال

ورحت الزياره الأولى

بصراحه

ما حستش قوى برضه بيهم

حسيت أنه تعاطف بس

عرفت طفلين إتعلقت بيهم

شلبى فى الصف السادس الإبتدائى بس عنده كبرياء بشكل ما يحسسكيش إنه تعبان ومحتاج حاجه من حد

وما إندمجتش معاه بسهوله وكمان فى موضوع غير تعبه بس غير كده لا يمكن يحسسك بضعفه ومرضه

ماشاء الله عليه خاتم للقرأن ومن الأوائل كل سنه فى المدرسه
ربنا يحفظه ويشفيه

الطفل التانى زياد (زيزو) زى ما بيحب
سنتين ونصف


ما بيندمجش مع أى حد الحمد لله جدته قالت لى إنى الوحيده إلى انمدمج معايا

ولد ماشاء الله تبارك الله فيما خلق
وجسمه كله متجبس ما عدا إيد واحده

ربنا العالم حبيته قد ايه بس فى الزياره التانيه ما لقيتوش وعرفت ان ذراعه التانى اتجبس كمان وروح بيتهم

وروحت مبسوطه من يوم حلو وأطفال بتلعب فيها الى مش قادر بس إلى طفولتهم غلباهم خفف إحساسنا بالمستشفى

الزياره التانيه

ما جاش كتير زى الزياره الأولى وكمان ما كانش هناك معظم الأطفال إلى شوفناهم فى الزياره الأولى

لأنهم بيروحوا وبيرجعوا حسب الجرعات ونظام معين

أحكيلكوا بقى على الى حصل

أول ما روحنا لقينا فى قلق فى أول قوضه ما كانش فيها غير بنوته بس

بس المره دى كانت لسه جيه برضه تبع نظامها بس سبحان الله ما فيش نظام غير نظام إلهى مترتب حسب ما يشاء سبحانه

رانيا

ممكن عمرها ما يزيدش عن 10-11 سنه ممكن يكون شعرها كان ناعم ورموشها وملامحها جميله

بس مرضها أخد منها كل مقومات الجمال إلى بتتعايق بيها البنات

أمر الله ولا راد لقضائه ولا إعتراض على عطائه

رانيا جاين طبيعى فى ميعادهم وكانوا جين فى القطار هى ومامتها بس وهى نازله إتخبطت فى خدها

أنا مش عارفه إيه الى حصل لها لأن الكل ما كانش بيقول لنا حاجه غير انها بتموت
وأنابيب وأجهزه وخراطيم ودم

منظر صعب جدا


دخلت لأنى بصراحه قلبى ما طاوعنيش ادخل من البدايه

أمها إتوضت وصلت ركعتين لله ليلطف بحالتها ولا تنطق الا بكلمه واحده

نجيها لى يارب

بصوت عال

وأم أخرى تصلى

ممرضه بجوارها تفعل لها المطلوب

وهى جثه ممدده نبض فقط وتنفس صناعى

الكل بدا يصلى الظهر ويدعى لها حتى الممرضات والله بالتناوب

بس للأسف ما طولناش لان الطبيب المعالج ليها خرجنا واتنرفز وقالنا الحاله حرجه

خرجنا روحنا وكل واحد فينا كمل حياته بصوره طبيعيه

بس على فكره رانيا ماتت بعد ما روحنا على طول

أعترف أنى لم أتأثر بحالهم إلا بعدما سمعت خبر موتها من أم شلبى مع البكاء الذى يسيطر على جميع الأمهات

فى يوم من الأيام حتتحط فى نفس الموقف أيا كانت صورته ولكنه موقف متتكرر قضاء الله لارد لقضائه

أنا يمكن مش عارفه كتبت إيه بس بجد بعترف بقساوة قلبى إلى كان بيتعاطف خارجيا فقط بس على فكره الفرق ده واضح لانى شفت بعين ما قريتش من وراء شاشات أو جرائد

اعزرونى لو غلطت او انى مش مجمعه بس الموقف صعب

بس كان لازم اقول لكوا علشان مش كفايه تعاطفنا بالكلام والشكر لبعض وخلاص على نقل الموضوع
لازم نفعل الموضوع اكتر من كده


معنويا وماديا بنشوف كم التبرعات والزيارات لمستشفى 57357 وفى اماكن تانيه ما كناش حتى نعرف انها موجوده

مش بس فى المنصوره لا الكل يدور حوليه وكل واحد فى بلده ممكن يعمل ده وان شاء الله ربنا حيعينه

ان شاء الله اجمع نفسى وارتب تفكيرى وأقولكوا

ما تنسوش تدعوا لرانيا وكل أطفال المسلمين


ويصبر قلوب أمهاتهم

ربى إغفر لى




هناك 15 تعليقًا:

  1. ربنا يرحمها يارب رحمه واسعه

    يارب ارحم موتى المسلمين جميعا
    ويارب انتقم من يوسف والى واتباعه يوسف عبد الرحمن وراندا مش عارف ايه
    منهم لله


    بس احنا كمان مهما قلنا ومهما عملنا مقصرين
    ربنا يباركلك ويحفظك ويعزك يارب ياسمسمه ومايسؤماش ابدا فى حد من اهالينا ولا اولادنا ولا اى حد

    ربنا يتقبل منك

    ردحذف
  2. ربنا يرحمها ويرحم جميع مرضي المسلمين

    اسمحيلي اقولك ان انا كمان كنت زيك ومتأثرتش غير لما قريت كلامك دلوقتي

    وربنا يغفر لنا قسوة قلوبنا

    ويملا قلوبنا بالإيمان

    تحياتي

    ردحذف
  3. ربنا يرحمها يارب ويشفى الأطفال دى يارب ويقدروا يعيشوا حياتهم زى الأطفال يارب

    ردحذف
  4. ربنا يرحمها ويدخلها فسيح جناتة

    ربنا يكون فى عون الاطفال البريئة دى

    مع خالص تحياتى

    ردحذف
  5. اللهم ارحمهم رحمه واسعه وصبر اهليهم

    ردحذف
  6. السلام عليكم ورحمة الله وبركاته
    حياكى الله وبياكى أختى الكريمة
    نسال الله العظيم أن يغفر لهم ويرحمهم ويجعل قبورهم روضة من رياض الجنان .

    لو سمحتى أختى انا بعمل دليل يشمل عنواين وتلفونات وكيفية التبرع لكل المستشفيات ودور الأيتام وكل ما هو متعلق بالأطفال إذا عند حضرتك أى إضافة ياريت تبعتيها وجزاكى الله خيرا .
    وأسأل المولى عز وجل أن يلين قلبك لخشيته وأن ينير دربك للجنة إن شاء الله .
    دمتى فى حفظ الله

    ردحذف
  7. السلام عليكم ورحمة الله وبركاتة ,,
    اولا جزاكى الله خيرا على الموضوع الجميل الرائع دة ... لانة فعلا اثر فينا كنا ومش مهم انك متأثرتيش فى الاول بس كفاية انة رقق قلبك بعد كدة ودة الى كنا الحمد الله فى الحملات بنسعى لية وربنا يتقبل منك ومن المسلمين صالح الاعمال ... وكدة يبقى كلنا الحمد الله نجحنا اننا نوصل للاطفال دى ونعرف كل حاجة عنهم عن مأسيهم وانهم ازاى بيتحدوا المرض بأرادة قوية وربنا هيجزيهم خير ان شاء الله ... كما قال الرسول فى حديثة فإن كل ما أصاب المسلم كفارة له ، حتى الشوكة يشاكها أو النكبة ينكبها . رواه مسلم في الصحيح

    ردحذف
  8. السلام عليكم ورحمه الله وبركاته
    اولا جزاك الله خيرا يارب على ماقمتى به من زيارات لهولاء الاطفال وجعل كل حرف فى ميزان حسانت يارب ويارب يرقق جميع قلوب المسلمين وخاصه من اصحاب النفوس الضعيفه اللى مش فاكرين انى فى نهايه للدنيا ويارب يجعل قبورهم روضه من رياض الجنه سواء اطفال او كبار او فتيات زى ما قولتى فقدت كل شىء بتتجمل بيه من خلق الله وسبحان الله ولا راد لقضائه وبحييكى كتير على الكلمات التى مست قلبى انا خاصة
    ووفقك الله لما يحبه ويرضاه وجعلك زخرا للمسلمين

    ردحذف
  9. اولا ربنا يتقبل منكم جميعا الدعاء ويرزقنا الإخلاص

    ثانياالى اخى الكريم هكذا علمنى سيدنا محمد (صلى الله عليه وسلم) ان شاء الله احاول اجيب لحضرتك البيانات دى بس حسال الاول لانها مش معايا وربنا يوفقنى واعرف اجيبها

    ثالثا جزاكم الله خير اجميعا احبتى فى الله جمعنا الله فى ظله يوم لا ظل الا ظله

    ردحذف
  10. اللهم امين nana
    جزاكى الله خيرا
    نورتى مدونتى

    ردحذف
  11. حقا كفى بالموت واعظا
    تقبل الله منك
    جزيت خيرا

    ردحذف
  12. مش هنسكت محط أنظار المدونين

    في

    تحت الأضواء فتابعونا

    ردحذف
  13. اللهم ارحم موتنت وموني المسلمين
    فقد صدق الرسول في قوله "اكثروا من ذكر هادم اللذات"

    ردحذف
  14. شكرا اخبار المدونات على الدعوه


    محمد الشايب
    اللهم ارزقناواياك حسن الخاتمه واغفر لنا وارحمنا وموتى المسلمين

    ردحذف
  15. امممم

    انصدمت يوم عرفت انها ماتت

    الله يرحمها برحمته

    ويلهم ذويها الصبر والسلوان

    ويصبرنا على هالدنيا

    وعلى ابتلائاتها يا رب :(

    ردحذف

إتفضلوا هنا لو كلامى عجبكواأو حبين تقولوا لى حاجه