الجمعة، 31 يوليو 2009

شوية فضفضه

شوية كلام

بما إننا فى الصيف والجو حر كان نفسى دلوقتى أكون ولد مع إنى بحمد ربنا إنى بنت مش ولد
بس حد يسألنى ليه دلوقتى نفسى أكون ولد

للأسباب الأتيه
كان نفسى أخرج وأتمشى براحتى فى أى مكان ولأى ميعاد طبعا ما حدش حيحاسبنى ذى ما بيحاسب البنت
بس هنا
stop

طبعا مش حعمل حاجه غلط ومش حخرج عن نطاق العقل والأصول

كله بالمعقول

بس كنت حتمشى على الكورنيش وأتفرج على النيل براحتى وأتمشى مع أصحابى
أتعشى بره أروح أى مكان مع أصحابى ومش حبقى مقيده بميعاد خروجى أو بمكان وجودى
مهو ده إلى بيحصل ولا لا حد ينكر

أنا عن نفسى ده بيحصل عندنا إخواتى بيخرجوا براحتهم فى أى وقت وطبعا بيسهروا وأبسط رد

إحنا فى أجازه والناس كلها سهرانه
طبعا الشباب بس

شوفتوا بقى ليه كان نفسى أبقى ولد خصوصا فى الحر ده والصيف
بس طبعا الحمد لله إنى بنت
مش عارفه
مهو كان ممكن لو كنت ولد كنت أعصى ربنا مع إنى بقول إنى ما كنتش حعصاه
محدش يعرف
إلى ربنا إختارهولى هوه الخير

اللهم لك الحمد

حاجه بقى زعلانه من نفسى قوى بسببها

إستسلامى لحالة الكأبه والحزن أحيانا
مش أحيانا بس

لا بجد كتير

بسلم لها نفسى قوى ويمكن بقدم لها نفسى على طبق من فضه

بلوم نفسى كتير بس الظروف لما بتحكم ما بقدرش رغم إنى ببقى مرتبه إنى ما أستسلمش

المشكله إنها بقت بتسيب أثار سلبيه

الحمد لله إنها بتبقى فتره وتعدى بس أهى برضه بتبقى معكننه على وشله كل تفكيرى

أدينى بحاول أروض نفسى

على فكره دى حاله جديده على
ما كنتش كده زمان

يمكن من نفسى !!!

حاجه كمان

بدعى ربنا يبارك لى فى شعبان ويبلغنى رمضان ويبلغنى ليلة القدر ويجعلنا من عتقائه من النار ومن المرحومين
أنا وجميع المسلمين

وأدعوا الله أن يتجاوز عن خطيئتى ويغفر زلتى وترفع صحيفتى بالحسنات ويتجاوز عن السيئات

لأنى بجد حاسه إن ذنوبى كتيره جدا

ربنا إغفر لنا ذنوبنا وإسرافنا فى أمرنا وتجاوز عن سيئاتنا وتوفنا وأنت راض عنا وإختم بالباقيات الصالحات أعمالنا
اللهم إرزقنا حسن الخاتمه وأجرنا من سوء الخاتمه

وللحديث بقيه إن كان فى العمر بقيه إن شاء الله

لا تنسونى من صالح دعائكم


هناك 16 تعليقًا:

  1. أولا ربنا يفك عنك الكأبه وضيق النفس
    وبعدين انا بتعجب إن البنت ساعات تحب تكون ولد علشان الفسح وإنما فى حالة كونه بقى مسؤل عن أسره تقول البنت أفضل لأنها مبتكونش متحمله مصاريف مع إن البعض من النساء بيصرفوا على أسر وبعدين البنت ربنا مهيأها شويه للبيت إنما الولد فلأن وظيفته فى الحياة كعائل لاسره تجعله ينفر من المنزل حتى لو كان لا يعول

    واعتقد إن كما من حق الولد يتفسح من حق البنات أيضا إنهم يتفسحوا لكن كون الفسحة لمتاخر فاعتقد إن الامان على الطرق مبقاش موجود وضعف البنت يعد قصور فى الدفاع عن نفسها

    تقبلى مرورى

    ردحذف
  2. السلام عليكم
    مدونة مش هنسكت أصبحت مفتوحة للأعضاء فقط وتدعوكم للمشاؤكة معنا في ملتقاها وم الاثنين المقبل الموافق 3/8/2009 الساعة العاشرة مساءا بتوقيت القاهرة كميعاد للقائنا عبر الشات لمناقشة أوضاع المدونة وما ستئول إليه المدونة في الفترة المقبلة ومراجعة ما وصلنا إليه منذ إنشاء المدونة
    نسعد بحضوركم واهتمامكم عبر الإيميل الخاص بالمدونة : marwa_elsherbiny09@yahoo.com

    ردحذف
  3. الحــ ــزين
    صدقينى كلامك مظبوط ومش هاغلطك بس لان دى وجهات نظر ودى وجهت نظرك
    بس فيه حاجة أنا ولد وبقولك إحمدى ربنا واشكريه إنو خلقك بنت

    الحــ ــزين

    ردحذف
  4. صدر العدد السابع عشر من مجلة رؤية مصرية بالمفاجأة القوية الجديدة .. تصميم وبرمجة مختلفين تماما ليواكبوا نجاحات المجلة ويتفقوا مع مادتها وأقلامها
    دعوة خاصة مني أنا رئيس تحرير المجلة لزيارة المجلة والتفاعل معنا فيها وإبداء آرائكم .. سجل عضويتك وارسل مشاركتك .. معنا فؤيق كامل من المحررين والصحفيين يقومون لكل أعباء المجلة لتخرج لكم في أبهى صورة وأجمل منظر
    ننتظر تشريفكم
    دمتم بخير
    إبراهيم العدوي

    ردحذف
  5. السلام عليكم
    اللهم امين يارب بلغنا رمضان وهدينا لخير الاعمال وبارك اللهم لنا وعافينا من كل شر وكل عمل يقربنا الى النار امين يارب الناس اجمعين
    على فكره انا ولد وشاب زى الشباب بس هاتصدقينى لو قلتلك نفسى انا كمان اتفسح بس للاسف مفيش وقت مش كل الشباب ليها بابا وماما لا هناك شباب كتيره قوى بتتعب وتشقى علشان تبنى نفسها كمان لو قلتلك انى عمرى محسيت انى نفسى اتفسح او ادخل سينما او اصيف او الحاجات دى بس منك بتفكرى فى الحاجات دى دا المخليكى حزينه ومكتئبه فكرى فى اى حاجه تانيه عندك مدونه عندك اصحاب عندك انتى ايوا اكلمى مع نفسك وقوليلها باذن الله بكره هايكون احسن وتخرجى وتتفسحى ياله سلام يارتنى كنت بنت هههههههههههه

    ردحذف
  6. الخوف لو تكونى كئيبه علشان متطلعتيش ولد هههههههههههههه
    ارجوك متستلميش للحزن او الكابه هى مش ناقصه
    دمتى سعيده ومرحه

    ردحذف
  7. انتى جميله وحبيبه وربنا يفك كربك ويعدك ويهيدكى لكل خير
    بحبك فى الله
    نورينى بقه علشان تعرفى الخبر الجميل

    ردحذف
  8. السلام عليكم ورحمة الله وبركاته

    كلامك والله صح انا من الناس اللى فعلا قلت كده لو انا ولد كان زمانى دلوقتى خرجت فى اى وقت اتمشى واخرج فى اى مكان بس طبعا من غير مااعصى ربنا باى فعل وف نفس الوقت مبسوطه انى بنت
    ربنا يكرمك يارب ويفك كربك وكرب كل مسلم
    ويسعدك يارب ويتقبل منك ومنا صالح الاعمال

    دمتى بخير وسعاده
    احبك فى الله

    ردحذف
  9. اهلا بك ايهاالمهاجر ربنا يتقبل منك
    على فكره انا عمرى ما اتمنيت انى اكون بنت بس طبعا ده احساس وقتى مر بى وكمان فى بنات كتير جدا متحمله مسؤلية اسرهم ومتحملة مسؤليه كونها بنت وكونها احيانا مسؤله عن الاسره وكتير كده وانا واحده منهم على فكره يمكن المسؤليه هى الى بتاثر شويه وبتخلى الواحد محتاج يهرب منها
    انا معاك ان الدنيا دلوقتى ما بقالهاش امان بالنسبه لخروج البنت وكمان الاصول لازم نتبعها ولا ايه ؟؟
    نورتنى برايك الى اكيد افادنى

    ردحذف
  10. أعتزر مصعب لانقطاع النت عندى ما عرفتش ادخل امبارح وان شاء الله احاول اعرف ايه الى حصل

    ردحذف
  11. نورت مرايتى ايها الحزين
    ربنا يفرح قلبك وينور قلبك بنور الايمان
    على فكره انا بحمد ربنا واشكر فضله انى بنت وعمرى ما فكرت فى موضوع نفسى ابقى ولد ده احساس لحظى بس واكيد له اسبابه
    وبعدين كل الى ربنا يختار هولى خير
    ربنا يكرمك ويعزك

    ردحذف
  12. اهلا بحضرتك يااستاذ ابراهيم اعتزر عن انقطاع مشاركات فى رؤيه مصريه ولكن لاسباب والحمد لله خلصت
    ان شاء الله لنا عوده
    نورتنى

    ردحذف
  13. عليكم السلا يا ايهاب عامل ايه
    على فكره ان اتفهمت غلط قوى فى البوست ده والله كان تاثير حر بس يا جماعه
    على فكره انا كمان عمرى ما فكرت فى الخروج والفسح دول بيتحيلوا على علشان اخرج وايه الى مقعدك فى البيت يابنتى اخرج وزورى الناس وانا كل ده مش فارق معايا ومش بهتم خالض بالمصايف والكلام ده
    وعلى فكره مش انت لوحدك الى بتفكر كده والحمد لله مش مكتئبه ولا حاجه انت الى ربطت الموضوعين ببعض
    انا بقول انى بستسلم للحزن فى مواقف معينه وما بتعديش بسرعه بتاخد وقتها معايا وان شاء الله بكره احسن لى وليك وللكل كل الى ربنا مختارهولنا خير
    ربنا يفرح قلبك ياريت اكون عرفت اوصل اصل الحكايه

    ردحذف
  14. اسامه
    الحمد لله والله انا مش كئيبه ولا حاجه بالعكس انا عمرى ما بان على قدام حد انى مضايقه من النوع الكتوم
    وللمره الالف الحمد لله انى بنت وعمرى ما اتمنيت اكون ولد بس ذى ما قلت ده احساس لحظى تمام
    وموضوع الاستسلام للكابه حاجه تانيه مش مرتبطين
    ربنا يسعد قلبك

    ردحذف
  15. اهلا ياحبيبة قلبى جيجى حد برضه يبقى له اصحاب زيكوا ويبقى مضايق
    ماشى يا ستى

    ردحذف
  16. احبك الله الذى احببتنى فيه صمت الحنين نورتيتى يا حبيبتى
    ربنا ينور قلبك بنور الايمان

    ردحذف

إتفضلوا هنا لو كلامى عجبكواأو حبين تقولوا لى حاجه