السبت، 27 يونيو 2009

كارثه

كارثه والله
خرجت إمبارح مع واحده صاحبتى تشترى لبس
ومن هنا بدأت الكارثه

طبعا نزلنا نتفرج كل المحلات بنفس الإسطمبه بضيهات وبنطلونات وعلشان أبقى عادله كان فى جيبات
تمام
طب يعنى المحجبه إلى يعن لبسه معقول وواسع شويه تعمل إيه
تروح تشترى من أمريكا
بيتهيألى حنلاقى هناك لبس واسع

إحنا بلاد المسلمين بقى كل اللبس المعروض عندنا بضيهات
طب أعمل إيه

وكل ما صاحبتى تقيس حاجه نقول للبنت إلى فى المحل ما فيش أوسع تقول لى أنتوا أول حد يطلب منى كده كل إلى يجى يقول العكس ما فيش أضيق أنا عاوزاها ماسكه
وبقت مستغربانا

وطبعا هلكنا وفى الأخر روحنا من غير ما نشترى

طب ليه كده
همه دول بقوا بنات المسلمين كل اللبس بقى بضيهات على بنطلونات أو جيبات ودى طبعا بتبقى المحتشمه
وطبعا الإقبال على البضيهات خلى كل إلى بستورد أو بيصنع يصنع بضيهات وبس
وإلى ما بتلبسش بضيهات تتعود لأن ما فيش غيرها
رفيعه بقى ولا تخينه مش حتفرق
خليكى إستايل وما تبقيش بيئه
عجبك شكلك البيئه ده واسع وطرحه كبيره حتتمدنى إمته ؟؟
أسأل الله العفو والعافيه
أسأل الله العفو والعافيه

يا حبيبتى ليه كده

ليه بتظهرى إلى ربنا أمرك بستره ليه بتكشفى ستر الله عليكى
تخيلى لو قابك رسول الله صلى الله عليه وسلم وأنت لابسه كده
حتقولى له إيه؟
حتقدرى تقولى له دى الموضه؟
حتقدرى تقولى له كل البنات بتلبس كده؟
حتقدرى أصلا تواجيهه كده؟

لو حتقدرى خلاص أنا مش حتكلم

إنما عن نفسى والله ما حقدر لو لبسه كده أخرج من باب قوضتى
مش أمشى فى الشارع والبنات قبل الولاد يتفرجوا على

والله أنا بنت ولو شفت بنت لابسه لبس لايليق على الحجاب أو لا يليق أصلا بمسلمه ببقى منتقضه شكلها
طب ليه؟

ربنا أمرنا بالستر ودى فطره بشريه

ياحبيبتى
حاول تراعى ربنا فى لبسك مش الناس

ياحبيبتى
خافى من يوم لا ينفع مال ولا بنون

ياحبيبتى
إسترى نفسك نصره لدين الله

يا حبيبتى
إسترى نفسك نصره لرسول الله

ياحبيبتى
إسترى نفسك ولا تشمتى فينا إعداء الإسلام

ياحبيبتى
إسترى نفسك من أجل تحرير الأقصى

يا حبيبتى
إسترى نفسك ليوم تشخص فيه الأبصار

يا حبيبتى
إسترى نفسك حتى لا تفتنى غيرك نساء ورجال وتضيع حسناتك ليأخذها من فتنتى وظلمتى

هذه والله تذكره لى حتى لا تزل قدمى قبل أن أذكر بها غيرى


هناك 14 تعليقًا:

  1. و الله انا مش عارف اقولك ايه ، بس هو اينعم الموضوع دي و من المفترض اننا نتسمك بدينا شويه و على قدر ما نقدر برده ، لكن ارجع و اقولك هو الموضوع راجع لاننا ماشين بثقافه مجتمع و كل ما تعليمك و ثقافتك قلت كل ما مبادئك و اهدافك و اراءك قلت ، كل ما بقيتي ماشيه مع الموجه و خلاص و مش عارفه يبقى ليكي مبدأ او رأي او حياة مختلفه التيار للأسف بيكون اقوى منك ...

    يعني انا مقدرش اجيب كل اللوم ( ولو ان اكيد عليهم لوم برده ) على البنات دي و اللي هى خارجه من مجتمع بيقولها : الناس الناس ، المهم الناس حتقول علينا ايه يا بنتي ، و بعدين لما تتنيلي تلبسي واسع كده و محبكاها علطول مين من الشباب حيبصلك ؟! يا بنتي بقى خلينا و اقعيين ، عجبك يعني نفسك كده قربتي على 27 ، ده كل صحباتك اتجوزا و خلفوا كمان ، عجبك قدتك دي جنبي ، و في مواقف تانيه تكوني رايحه فرح معين و تسمعي الكلام : انتي عبيطه كل البنات رايحه تفرح و تهيص و تروحي انتي كده مكتفه نفسك ، ما تبقيش معقده بقى ، حتى يوم الفرح ، يا شيخه دي الافراح دي بتبقى رزق للبنات ....

    و هكذا من المواقف اللي للأسف معظم البنات مش بتقدر تستحمل الضغط اللي انا عارف انه فعلاً رهيب ، و اللي بتسمع من زميلاتها مثلاً شويه تريقه و ربما انسياق المجتمع للتيار ده يكون اقوى منها ..

    لكن ارجع و اقول الموضوع اراه من الصعب ان يكون بالاجبار ، كل شئ اتى دون فهم و اقتناع لن يطول ، إن لما تربى و تقتنع انها بهذه الطريقه و اختزال جمالها في جسدها يحولها إلى سلعه و بالتالي إلى التقليل من شأنها و هى التي خلقها الله نصف المجتمع و تربي الاجيال ، تتنافس مع باقي الناس على جمال الاجساد ، و تتحول إلى سلع تعرض على الشباب حتى يختار اجمل بريق من السلعه ، و بالبطلع إذا ذهب بريق السلعه التي اشتريت من اجله ، ذهب فائده السلعه ...

    اعلم ان الموضوع كبير و الكلام فيه كثير و لكن هذه الاشياء لا تتغير ما بين يوم و ليله ، و ليس علينا إلى التحلي بالاخلاق و الاهتمام بالعلم .

    ردحذف
  2. سلام عليكم
    انا الوصيف يعنى التانى
    الغرب لما حرب المسلمين فى دينهم جه عن طريق المراه وعندما اردوا لها التحرر كما يدعون وهم يقصدون التحرر من الدين وعندما خلعت الست هدى شعرواى النقاب هللوا لها
    يعلمون ان بحجاب المراه سينتصر الاسلام
    سيدتى انا لا استطيع ان ارتب كلامى ولكنك اثرت بقلمك مشاعرى تجاه الحرب على الاسلام بدعوه تحرر المراه
    تحياتى

    ردحذف
  3. سمسمة
    عندى العلاج
    لو المقاس 30 زودى عشر نمر

    وبعدين البنت غللى بتلبس ضيق فى دماغها هيجيلها عريس مع أن الشباب بيدور على المحتشمة حتى لو وحشه هى إللى هتصونة ودى هى الحقيقة

    ردحذف
  4. عندك حق والله ياعبد من عباد الله دى فعلا بقت كلمات الأمهات دلوقتى والأصحاب وانت متابع اهه بس والله إلى بيحصل حرام الشارع بقى مكان لعرض الملابس مش عاوزه اقول لحاجه تانيه

    بس فى اختلاف معاك دلوقتى على فكره ما بقاش الموضوع مرتبط بالثقافه لان برده الكل بقى بيبص لها على انها انفتاح وتتطور حتى المثقفين كمان بيلبسوا كده دا بقى مظهر عام ما بقاش الناس بتوع العلم غفر زى زمان زى ما كان بيتقال عليهم

    ربنا يهدينا ويهدى كل بنات المسلمين

    ردحذف
  5. لى الشرف يا اخى الكريم اسامه يكفى نورك فى مدونتى الصغيره جدا

    أما بالنسبه للحرب فهى أخطر حرب ممكن ان نواجهها فهى حرب تعمل على تغيب العقول والانسياق وراء ما تسميه انفتاح وتطور انسياق اعمى دون معرفه الاستفاده من عدمها
    البنات بتقلد وخلاص علشان تبقى شيك وحلوه فى نظر الناس
    اسال الله العفو والعافيه

    ردحذف
  6. أضحك الله سنك أيها المهاجر
    معقوله طب حيمشوا ازاى طب خليها فى المعقول

    فعلا والله ده الى حاصل لما الشاب بيفكر يتجوز بيفكر فى الملتزمه مش واحده يمشى معاها والناس تتفرج عليها وإن كان فى شباب عاوزه كده بس نسبه قليله جدا وده أكيد واضح من راي الشباب الى ردوا
    ربنا يكرمك ويعزك وينفع بيك المسلمين

    ردحذف
  7. سمسووومة
    انا جيتلك اهو نورتى المودونة بتاعتى ة ابقى تعالى تانى
    والله انا ماعرفة اقول ايه
    دلوقتى الموضوع بقى زيادة اوى و بعدين الغلطة من البنات لو البنت تقول ان هى عايزة بلوزة واسعة و بنطلون مش قافش فيها
    كان اللى بيستورد ولا بيصنع هايعمل الواسع لان السوق عرض و طلب و بعدين نفسى اعرف منين بتضايقى لما بتتعاكسى و منين بتلبسى اللى يقول للى قدامك عاكسنى
    حاجة بقت فوق المحتمل ربنا يحفظنا برحمته و يهدى بنات المسلمين

    ردحذف
  8. ممكن رايك بس يكون سريع
    القلب باكى وحزين وكل الاعضاء تشاركه الاهات والاحزان يخرج صوت من الظلام نابع من الاعماق الى متى يجب ان ننتهى من هذا


    العقل ينظر بنظره عطف ويقترب من القلب ويضمه بحنان نابع من داخله ويقول بصوت دامع قسوت عليك ولكن كنت اريد ان اعرف نهاية هذا وهل انت هكذا لان هذا امر جاد وليس مشاعر مراهقين انها علاقه مش كلام فى الهوى يطير نظر القلب اليه نظره التائه من يبحث عن الاهل من يريد ان ينقض على احضانهم ليشعر بالامان


    العقل قرار هام حين ياتى المساء سنصل لمن احبه القلب وسنقف على الباب ونقص قصة قلبى علها تجد صدى ومستمع


    صاحة الاعضاء وتعالة البسمات والصرخات العين بكت لكن بكاها مختلف فهو بكاء الفرح واللسان توقف وكل الاعضاء كانت فى سعاده لا توصف بكلام


    وفى المساء ارتدى الجسد اجمل الثياب وتريح بعطر خاص ومش منتشى من فرحته الى من عشقها وتمنى ان يذوب فى احضانها وان يبقى عمره كله بين يديها سرح العقل فيما سيقول واعد اللسان افصح كلام والعين تميزة ببريق خاص مملوء بالكلمات والهمسات والعبارات والاذن استعدت لتسمع اجمل قرار كل الاعضاء وفى فوج كبير من الناس مش بينهم الجسد وكانه طاير فى السماء كلما مضى خطوه شعر انه يرجع للخلف كان يدفع نفسه بقوة الى الامام كان يشعر ان قدمه مقيده فهو لا يقدر على السير كلما اراد ان يطوح يده ليضرب بها الهواء لينطلق بسرعه لمن عشق وذاب العقل سارح مشغول فيما سيقول واللسان يحضر انسق الكلام اقتربت القدم واهتز الجسد خائف فسمع منادى ممن تخاف ادخل استغرب من هذا وكيف علم بقدومى نظرت الاعضاء الى بعضها فى دهشه وهم بالكلام فوجد اللسان لا يتكلم حاول ان يسلم بيده اليد لا تتحرك حاول وحاول ما هذا القلب يكاد يجن مما هو فيه كانه شل يدق ويدق ولكن لم يعد هناك دم توقفت الاعضاء نظر القلب وحاول يصرخ وينادى فلم يجد احد اين الناس ولما تركونى وحيد فى هذا الظلام يحاول ان يفتح عينه ماهذا يريد ان يصرخ ان يصرخ ولكن كل المحاولات بائت بفشل ومن بعيد وجد نور غريب يسطع ويملىء كل ما حوله حاول ينادى لم يستطيع زحف ولكن اليد ترفض ان تنصاع فنفطر القلب ونجرح وسال الدم بعدما جف الدمع وفى يائس وجد النور يقترب خائف تعالت دقاته التى تقترب على الانتهاء واذا بفتاه جميله لن يقدر على وصفها اى بيان ومهما اوتى من علم الكلام نظر اليها نظرة تسال انتى هنا فنظرة اليه ونظر اليها نظرة تامل وتساءل لما تركتينى لما تركتينى فى عالم تاهت فيه معانى النقاء والاخوه عالم الطمع الجشع عالم الغدر والخيانه تركتينى بين بشر بالكلام لكن فى الاصل غيلان نظر حوله وجد كان المكان يضيق ويقترب منه حتى صار بين احضانه يعتصره لم يعد يقدر على الصراع بل استسلام لانه علم انه سيلقى من يحب وانها ليست فى هذا العالم تبسم وصرخ لتنتهى قصة قلب احب وصدق فى حبه وبقى على عهد من احب حتى بعدما صار بين الاموات .
    انا بعتها لاتنين انتى التانيه ياترى ممكن تقولى رايك بصراحه انا كنت عاوز اكتب حاجه لقتنى بكتب حاجه تانيه مش عارف ليه يمكن لان هذا الحب بات من المستحيل ان يكون واقع وان للاسف معدش فيه حد اصل بيحب او يكون صادق فى الحب صدقينى انا حاولت بس لقتنى بكتب كلام تانى خالص ممكن رايك يهمنى قبل منشرها عندى ممكن اعرف رايك

    ردحذف
  9. عزيزتى

    ما الحجاب مبقاش حجاب للتدين دلوقتى

    يعنى تلاقى محجبة مش بتصلى مثلا

    علشان كده من الحجاب تعرفى اللى لبسه حجاب لبسه ليه

    لبساه علشان رضا ربها

    ولا لبساه علشان بقه الحجاب اللبس السائد دلوقتى

    ربنا يهدى الجميع

    ويجعل اعمالهم فى ميزان حسناتهم

    تحياتى

    سلام

    ردحذف
  10. أسفه جدا ياصدفه جميله على تاخير الرد بس بقى لى كام يوم ما بدخلش
    طبعا أنت عارف راى فى كلماتك بس المره دى الى شدنى احساسك الرائع وتفاعل الكلمات بين يديك بجد والله جميله وإن شاء الله يتحقق مهى حبيبتك بقى حتبقى من الحور العين طبعا جمالها ماحدش يقدر يوصفه وإن شاء الله مافيش حاجه مستحيله على ربنا وزى ما فى الغدر وقلة الصدق اكيد برده فى ناس كويسه جدا والى نصيبك معاها ان شاء الله حتكون احسن البشر لان ربنا حيعوض القلب الرائع والصافى ده بس انت حاول ترضى بما قسمه الله لك
    ومعلشى لو ربنا قدر وكتبت حاجه غير الى كنت ناوى تكتبها بتحصل دايما أما بقى ومتشكره جدا ان راى بيمثل بالنسبه لك حاجه مع انى والله ما استاهل ربنا يكرمك ويرفع قدرك اخى الكريم ومعلشى مليون مره كمان انى اتاخرت

    ردحذف
  11. أسفه جدا ياصدفه جميله على تاخير الرد بس بقى لى كام يوم ما بدخلش
    طبعا أنت عارف راى فى كلماتك بس المره دى الى شدنى احساسك الرائع وتفاعل الكلمات بين يديك بجد والله جميله وإن شاء الله يتحقق مهى حبيبتك بقى حتبقى من الحور العين طبعا جمالها ماحدش يقدر يوصفه وإن شاء الله مافيش حاجه مستحيله على ربنا وزى ما فى الغدر وقلة الصدق اكيد برده فى ناس كويسه جدا والى نصيبك معاها ان شاء الله حتكون احسن البشر لان ربنا حيعوض القلب الرائع والصافى ده بس انت حاول ترضى بما قسمه الله لك
    ومعلشى لو ربنا قدر وكتبت حاجه غير الى كنت ناوى تكتبها بتحصل دايما أما بقى ومتشكره جدا ان راى بيمثل بالنسبه لك حاجه مع انى والله ما استاهل ربنا يكرمك ويرفع قدرك اخى الكريم ومعلشى مليون مره كمان انى اتاخرت

    ردحذف
  12. منورانى يا بنوته ويارب تزرونى دايما
    ربنا يهدينا ويهدى ويستر كل بنات المسلمين

    ردحذف
  13. ياترى انتى انصدمتى ليه
    ياترى كلماتى وحشه
    طب ممكن سؤال ياترى فيه انسانه تستاهل الكلام ده
    ياترى لو كان واقع اعمل ايه
    طب لو واقع والانسانه دى انخطبت
    البطل بتاعى هايعيش احساس جديد يارب مايعيشه اى حبيب وانه يحضر فرح حبيبته التى احبها بصدق
    ياترى ممكن يعمل ايه
    انا لو مكانه هاكون مخنوق بس لازم اثبت ليها انها خسرت انسانا احبها ليس لاى شيىء سوى لانه احبها ولا يعرف سبب هذا الحب حتى الان
    لو قلتلك ان البطل بتاعى كان عارف نهايت هذا الحب من قبل ان يحب هاتقولى عبيط صح

    ردحذف
  14. اتصدمت أولا لانى قريت من الاول الحكايه ومابانليش انها تاليف يمكن كان سذاجه منى لانى بصدق الحاجات دى ولان حصل قدامى تجربه واحساسك كان صادق قوى والكل اتفاعل معاك على انها حقيقه وده اكيد لو كان خيال يبقى انت نجحت بجد

    واكيد فى انسانه تستاهل كل ده لوربنا وفقك ورزقك بالزوجه الصالحه اسال الله ان يرزقك وجميع شباب المسلمين

    ولو واقع وفعلا عملت كل الى عليك وربنا ما اردش فى النهايه ارض بقضاء الله واتمنى لها السعاده لان الى بيحب حد بيتمنى له السعاده سواء معاه او مع غيره مش تبقى انانى وتقول اتمنى لها السعاده بس معايا لان ده الحب الحقيقى ونصيحتى انه ما يحضرش فرحها علشانها قبليه لانها كمان كانت فى يوم من الايام بتحبه وحيبقى صعب عليهم الاتنين
    ومش بطلك بس الى كان عارف نهاية حبه كتير ذيه بس كان عاوز يعيش الاحساس الحلو ده وغصب عنه مشى المشوار رغم انه عارف نهايته وده مش عبط لا والف لا احيانا الانسان بيضحك على نفسه ولو لفتره علشان يحس احساس جميل ويعشم نفسه ان ظنونه ممكن تتغير وبيمشى بقوه اقوى من مقومته
    معلشى خبرتى فى الحاجات مش قوى بس يعنى مش عارفه قدرت اوصل احساسى ولا لا بس بجد والله اتصدمت لما عرفت انها كانت من الخيال لان لما نسمع ان فى فى الواقع كده بتحس انك مش شاذ وكنت زعلانه ان ضاع منها حد كده
    ربنا يكرمك ويعزك

    ردحذف

إتفضلوا هنا لو كلامى عجبكواأو حبين تقولوا لى حاجه