الأحد، 24 مايو 2009

مش عارفه أسميه إيه ؟ المهم أتكلم

مش عارفه أسمى البوست ده إيه بس فى حاجات كتير شغلانى ومضيقانى قلت أجى وأفضفض فى أوضتى

عندى سؤال

انا نفسى أعرف هى ليه الناس ما بتبطلش كلام على بعض ليه ؟؟

الناس بقت بتسلى وقتها بالكلام عن بعضها وتقول أهو بنضيع وقت طب الناس ذنبها إيه حتى لو مافيهمش عيوب بيتكلموا ويخترعوا حكايات تفتح الكلام ما تسيبوا الناس فى حالها ماحدش عالم بحالهم غير ربنا
لا وإيه بيطبقوا المثل (مالقوش فى الورد عيب قالوا أحمر الخدين )
دى حاجه

ثانى حاجه الناس إلى ربنا يهديهم وبيحشروا مناخيرهم فى كل حاجه
البنت دى لسه ما اتجوزتش
لا رفضت فلان ليه ؟
لا لسه ياعينى ما جالهاش حد ؟
بترفض يبقى فى حاجه ومستنيه حد ومرتبطه بحد؟
حنشوف خلفك امته ؟
كبرت !!!!
وووووووووووووووووووووووووووووووووووووووو
أسأله أرخم من الرخامه
الناس بقت بتعدل على ربنا
أستغفر الله العظيم
دا رزق وله معاد وله حكمه فى ميعاده
نعمل إيه بقى فى إلى ما ورهومش حاجه غير الناس

المشكله أن كلامهم خلانا تحت تأثيرهم ممكن البنت تكون مؤمنه وراضيه بقضاء الله بس تسمع الكلام تضايق وتبدا فى الإعتراض
ولا حول ولا قوه الا بالله
وممكن توافق على حاجه أو تعمل حاجه فى سبيل ارضاء الناس
أو بمعنى أصح علشان يرحموها بقى من لسانهم
بس مين هما بيرحموا وراها وراها
طب البنت تعمل ايه
والنتيجه بقينا عايشين خايفين من كلام الناس
بنطبق حكاية جحا وإبنه والحمار

المهم مش حنرضيهم فى الأخر

ربنا يهدى إلى ما وراهمش غير سيرة الناس

الثلاثاء، 12 مايو 2009

حتى الشباشب

بجد الواحد مش عارف يقول ايه؟

حتى الشباشب بنستوردها من الصين وإلى زود المبله طين

إنها بتجيب سرطان
عاوزه أعرف إيه المعضله فى الشباشب يعنى علشان نستوردها هى كمان هوه مابقاش صناعه فى مصر غير الأفلام وياريت أفلام عدله إلا كلها إسفاف وإغراء
لا وفى صناعه دلوقتى هى مش جديده بس تفوقنا فيها الأيام دى

صناعة المجرمين
أيوه بقت صناعه فقر وبطاله وغلا وبلاوى زرقه تفوقنا على أنفسنا بجد

طب وبعدين وأخرت إلى بيحصل ده إيه

لو حد عنده إجابه تريح قلبى يقولى

سلام

الخميس، 7 مايو 2009

بجد إحنا فى نعمه


لسه من شويه متفرجه على برنامج الخط الأحمر البرنامج ده بيجيب لنا مصر إلى ما نعرفش عنها حاجه

النهارده بقى كان فى بحيرة المنزله يعنى فى محافظتى الدقهليه هى يمكن تكون بعيده عننا شويه بس نفس المحافظه ده إلى إحنا عارفينه ...
أولا وصل للجزر إلى صور فيها وهى تبع البحيره عن طريق اللنش لأن مافيش طريقه تانيه للوصول
إتكلم مع الناس وهنا سبت إلى فى إيدى وقعدت
أحكى لكوا بقى

ناس عايشه فى عشش بالخوص والطين أو بالخشب على رأى المذيع إحنا قبل الميلاد ب200 سنه
وطبعا مافيش مياه للشرب بيشتروا المايه بالإسبوع لانش بيجبها ومافيش كهربه فى جزر جايبه مكن توليد كهرباء وناس بتعيش على لمبة الجاز وأكيد طبعا مافيش مجارى وصرف صحى ولا مدارس ولا مستشفيات عملوا لقاء مع واحد حكى أن مراته كانت بتولد بالليل واتصرف وجاب عربيه علشان يوديها المستشفى إلى بتبعد 50كيلو ومراته ولدة فى الطريق بيقول حتى مالقيناش بيوت ندخل عندها لأن الأماكن دى عباره عن جزر منفصله بعيده عن بعضها عبال ماراحت المستشفى حصل لها مضاعفات وإطروا يعملوا عمليه والدكتوره قالت لهم مش حتخلف تانى كل ده ليه علشان إلى قاعدين فى التكيفات وأحسن سبل المعيشه وما يعرفوش حاجه عن إلى المفروض مسؤلين عنهم وشغلهم هوه مصالحهم وطلباتهم بقى مش حرام إلى بيحصل ده

وكمان ما بيتعاملوش بالفلوس ذينا كده لا بنظام المقايضه يدى لراجل اللبن وياخدوا منه الرز والسكر والزيت وطلبات البيت الفلوس عندهم مالهاش قيمه !

كل أحلامهم إيه ؟؟؟
مدرسه ومياه شرب وكهرباء ومستشفى وفرن عيش شوفتوا لسه فى ناس بتحلم بإيه

أبسط الحقوق هى أحلام 50000 بنى أدم وإحنا أحلامنا إيه ؟؟ مظاهر لبس وعربيات وشقق وحاجات كتير همه حتى ما بيفكروش فيها

بنوته صغيره بتقول للمزيع بابا عاوز يطلعنى من المدرسه وأنا شاطره وبطلع من الأوائل علشان المشوار مهو عنده حق طفله بتروح مدرستها باللنش وبعدين تركب مواصله علشان تروح مدرستها خايف عليها مجهود لأطفال فى السن ده

وإشتكوا وطلبوا وكعادة طبعا المسؤلين إلى مش مسؤلين بتوع محافظة الدقهليه يقولوا أنتوا تبع محافظة الشرقيه والشرقيه يقولوا أنتوا تبع الدقهليه وهكذا ومحدش همه البشر دى ولا بيراعوا ربنا فيهم والنائب فى مجلس الشعب يشوفوه ساعة الإنتخابات وبس وده طبعا العادى

ناس أحلامها بسيطه جدا ومش رفاهيات دى الأساسيات والمسؤلين فين؟؟؟

حسبنا الله ونعم الوكيل فى كل واحد فى وضع مسؤليه وقصر فى حق الناس

الأربعاء، 29 أبريل 2009

حسرة وألم

بجد حاجه محسسانى بالحسره
بنات ولكن لا تستحى
أصبحت الموضه الأن التقليد الأعمى دون التفكير ولو لحظه
إلى حعمله ده صح ولا غلط
أضعف الإيمان
إلى حعمله ده حيناسبنى ولا لأ
كل البنات النهارده لا تنتظر حتى لما تروح الجامعه وتنطلق زى ما كان البنات بتفكر زمان
ودى طبعا حاجه غلط وحرام
البنات النهارده فى إعدادى وثانوى بيلبسوا لبس تخجل بعض النساء انهم حتى يلبسوه فى البيت
ناهيكم عن بنات الجامعه دى كارثه تانيه
طب ليه؟
فين ابائهم سمحوا لهم يخرجوا كده إزاى؟
إزاى بنت فى السن ده تخرج باللبس ده وبالمكياج ده؟
وإيه رايحه درس
المشكله إلى بتنقطنى إن البنت بتبقى خارجه مع مامتها بالشكل ده ومامتها منتقبه أو لبسه خمار لرجليها
طب إزاى؟؟؟؟
الإتنين متناقضين تماما طب ليه سمحت بكده
هى مش خايفه على بنتها؟
ومش خايفه من ربنا؟
كلكم راع وكلكم مسؤل عن رعيته
مع أننا الأيام دى ما بقناش نسمع حاجه أكثر من حوادث الإغتصاب وما شابه مع كده ما بيحصلش تغير
أسأل المولى عز وجل أن يستر بنات ونساء المسلمين

رسالة عتاب

هذه رساله منى لكل بخيل
ممكن تكون الرساله دى ما حدش حيقراها خصوصا إلى عاوزاه يقراها بس أنا بسجل بيها هنا إعتراضى

الرساله دى لكل بخيل فى مشاعره وإظهار حنيته وحبه بقصد هنا (الأباء والأمهات )
أعلم أن حب الأبناء هوه غريزه داخليه ومجود بالفعل داخل قلوب الاباء والأمهات حتى أنه ينمو من أول يوم يعرف فيه الزوجين بان الزوجه حامل ويكبر ويكبر مع الابن ولكن بعض الاباء ليس لديهم ثقافة اظهار مشاعر الحب لابنائهم مع ان الحب اصلا موجود مما يدفع الابناء فى مرحله من مراحل العمرللبحث عن من يشبع هذه الغريزه ( الشعور بالحب من قبل شخص ما ) شخص يشبع هذه الرغبه
شخص يعوض مالم يقم به الاباء
فقد نجد بعض الابناء متعلق بالجد او الجده أكثرمن الأب أو الأم أو بأى شخص قد يجد عنده ما يفتقده سواء أقارب أو أصدقاء أو من يسمع ويحاور ويحل لو فى مشكله بحب ويعطف فى لحظات الالم والحيره
انا شخصيا اعرف حد كان مرتبط بعمته لانها كانت بتسمعه وبتريحه وبجد حنينه معاه هوه حاسس انها احن من امه بس لانها بتبين له ده مع انه عارف ان امه بتحبه جدا وحصل قدامى اخته بتهزر وبتتكلم عليه مامتها ما سكتتش لما عرف ما بقاش مصدق لانه ما اتعودش يسمع منها حاجه بل كله اضهاد وشكوى مع انها ما بتستحملش عليه حاجه

ليه بقى الاباء ما يبينوش حبهم لولادهم بدل ما الموضوع يبقى أخطر من كده وطبعا مفهوم انا عايزه اقول ايه؟؟؟؟
الموضوع حيكلفهم ايه ؟؟
حيقولوا احنا فى ايه ولا ايه ؟؟
انتوا مش حاسين بحاجه؟؟
إحنا شغاليم فى ساقيه علشانكوا وعايزنا كمان نطبطب وندادى
أقولهم فى ناس زيكوا وشقيانه برده بس مش ناسيه الامانه والهبه الى ادهالها ربنا
لان ولادهم فى يوم من الايام برده حيكونوا اباء ولكن!!!!!!!!!!!!!!!!!!!!!!!!!!!
ما اتعلموش إذاى يحبوا ولادهم وتتكرر المأساه من جديد وتتفاقم الأزمه ويزداد الحب المحرم الذى يضر اكثر ممكا ينفع

انا عارفه إن كلامى رخم وتقيل بس واقع ونفسى بجد يتغير ومش عارفه أغيره وإلى بعمله ده أضعف الإيمان
جايز يبقى حافز حتى لينا اننا نتعلم من أخطاء أبائنا

أعمل إيه حاجه مضيقانى

السبت، 25 أبريل 2009

شكر للجميع


وجع القلب

بجدمش عارفه ليه الايام دى حاسه بوجع القلب

أنا عارفه إنى كتير بحس بوجع القلب بس الأيام دى مقلب على كل المواجع
بس معلومه : وجع القلب الى حاسه بيه مش وجع مادى أى مرضى
ولكنه وجع من نوع تانى وجع نفسى ومعنوى مش جسدى
تعرفوا يعنى إيه قلبك يوجعك
أأأأأأأأأأأأأه من وجع القلب

لما تعدى مع نسك وتفتكرى شخص عزيز فرقتكوا الأيام وما بقاش موجود فى حياتك
وهوه أو هى إلى كانت زمان معاكى بتفرح لفرحك وتزعل لزعلك جسدين بروح واحده
ساعتها تحسي إن روحك راحت منك
وساعتها حتحسى بوجع القلب

لما تعدى مع نفسك وتفتكرى لمة البيت الحلوه وقعدتك تحب عباية بابا فى الشتامن ناحيه
واخوىمن الناحيه التانيه ويحكى حكياته زمان وإحنا نسمع وننسى البرد بقسوته طول ما فى
أمان
بس كل ده عدى وراح وللاسف مش راجع تانى
ساعتها حتحسى بوجع القلب

لما تعدى مع نفسك وتفتكرى حب مر عليكى فى حياتك بس للأسف راح منك غصب عنك
هوه أصلا فى الأول دخل غصب عنك بس لما راح منك زعلتى عليه
لما تعدى مع نفسك وتفتكرى إلى حصل وتخرج منك تنهيده وأه غصب عنك تهز كل كيانك بدون قصد منك
ساعتها حتحسى بوجع القلب

يااااااااااااااااااااااااااااااااااااااااااااااااااااااااااااااااه حاجات كتيره تحسى معاها بوجع القلب
مش عارفه أجمع مواقف دلوقتى بس فعلا فى مواقف كتيره جدا بحس معاها بوجع القلب
وما أصعبه من إحساس
ما حدش بيحس فعلا بوجع القلب الحقيقى غيرإلى مر بيه
سواء من إنسان أو ممكن حتى من نفسى أو من ظروف
بس ياريت منكونش بعد كده سبب لوجع القلب لأى إنسان من النهارده
لأن ده فعلا سبب كبير لوجع القلب لى شخصيا
إنى أكون سبب فى وجع قلب بنى أدم خصوصا لو كان بيحبنى حتى لو من غير قصد

أسأل الله العظيم أن ينزل السكينه على قلبى وعلى كل قلب موجوع