الأحد، 24 أكتوبر 2010

إحساس مؤلم


  • أحمل فى قلبى خوفاً يؤرقنى

  • يسرق من بسماتى

  • يرتسم شبحه على ملامحى

  • لكنه بداخلى طوفاناً يسرى بين خلجاتى

  • أمواجه عاتيه تفوق قدراتى

  • خوفاً يضخ إلى جميع أعضائى

  • يسلبها قوتها

  • قدرتها

  • يفقدنى طعم كل شىء

  • ويجعلنى لا أقوى على شىء

  • أرتسم بسمه مغصوبه تخفى دمعاً محبوس

  • قلباً موجوع ألماً يخترق الضلوع

  • طالما صاحبت هذا الخوف وتحملته ولكنه هذه المره أعتى

  • أعرفه دوماً وصاحبته كثيراً وتخطيته أكثر

  • اليوم أخشاه

  • أخشاه

  • أخشاه

  • شدته تؤلمنى

  • تؤرقنى

  • تخيفنى بشده

الأحد، 10 أكتوبر 2010

ملكة وملك جمال الشعب



دخلنا فى موسم الصراع والكلام الحلو إلى بقى له مواسم

موسم الإنتخابات إلى لازم يبدأ قبليها بسنه أو يمكن أكتر

والله أعلم بيستعدوا له من إمته


زيارات لمستشفيات .. توزيع فلوس وأكل على الغلابه

وناس بتظهر كده فى المناسبات الخاصه بس بتاعتهم مش بتاعت الناس

مندوب لمرشح جارنا فى رمضان كان قالب الشارع

بيوزع مواد تموينيه وأمم عمرى ما شوفتهم فى حياتى وما أعرفش الناس دى جت منين

أهو خالى الغلابه تاكل فى الغلا إلى إحنا فيه

المهم الحفله إلى بعد التوزيع والهيصه إلى إتعملت للمرشح

يعمر بيت أبوه

بجانب الزغاريد الرنانه من أفواه غلبانه

وهو أصلا مش عارف إن الناس دى لا حتنتخبه ولا أصلا تعرف يعنى إيه إنتخابات

المهم

الحاجه المستفزه بقى جداً

كم الإعلانات إلى ماليه الشوارع ومتعلقه على كل البيوت

كأنه عرض لإختيار ملكة جمال وملك جمال الشعب

لا وصور بقى إيه !

ستات ورجاله بصراحه ما حدش مقصر أحلى صور وأحلى مصورين

وكم الستات المترشحه وصورها إلى بالطول والعرض وبطول البيت والحيط

هى مسابقه للجمال بالصور ولا إيه النظام !

مين الناس دى ؟

مين الألاف دول إلى كل يوم بيتعلق صور ليهم أكتر من إلى قبليهم

أنا رأى نختار المرشح صاحب أجمل بوستر

ما إحنا ما نعرفش الناس دى وإلى نعرفهم بيدخلوا كل دوره ويسقطوا

يا إما إلى بينجح ما بنشوفوش غير الدوره إلى بعديها

والهيصه والبروباجندا إلى بيعملها طبعا

نغير بقى

يبقى نختار بأحلى بوستر

مهم كده كده بيروحوا يناموا تحت القبه يعنى مش فارقه كتير


وعمار يا مجلس الشعب





الأحد، 3 أكتوبر 2010

كلمات سهلة النطق ولكن ؟

المجاملات

كتير بنجامل بعض بجمل ما أحلاها

بس ياترى الكلام ده بيبقى طالع من القلب بجد

يعنى الجمل إلى بيترجمها اللسان خارجه من القلب

ولا نفاق ومجرد كلام سهل ومجامله وبس مش حاجه بجد تتحس

بنجامل بكلام معسول ونضحك بوجه بشوش

بس للأسف زى ذهب قشره يبهر بلمعانه بس وراه معدن مالوش قيمه

وزى عروسه لعبه

شعر أصفر وعيون زرقا وخدود حمرا بس بلاستيك

يعنى جمال مزيف

ليه بنستخبى ورا قناع هذا الجمال المزيف

نفاق مجمل

ليه بنقول حاجه مش حاسينها

حللنا النفاق وخليناه وسيلتنا لكسب الأخرين وقضاء المصالح

ليه بنجمل الغلط والحرام ونقدمه لينا ولغيرنا

لحد ماوصيلنا إن الحلال والصح هو الغلط والغريب

تعالوا نغير الواقع الغلط إلى بقى هو الصح

تعالوا نسمع تانى العصافير وهى بتغرد مش حاجه تانيه قامت بالدور ده

قرار

مش حنافق مش حقول حاجه مش حساها لأى سبب من الأسباب

مش حجامل فى الغلط علشان مصلحتى أو مصلحت حد حتى لو ماقدرتش أقول على الغلط لا

مش حكون من إخوان الشياطين